30 mart 2011-ci il, səhər saatlarında Dalğa Gənclər Hərəkatının üzvü Təbriz Önər polis tərəfindən saxlanılıb. Polis heç bir səbəb göstərmədən onu Bakı şəhəri, Səbayıl rayon 9-cu polis bölməsinə aparıb. Bundan sonra Səbayıl rayon məhkəməsinin qərarı ilə Təbriz Önər fəallara qarşı tez-tez istifadə olunan “Polisə müqavimət” maddəsi ilə 5 sutka azadlıqdan məhrum edilib.
Biz, Dalğa Gənclər Hərəkatı olaraq, üzvümüz - Təbriz Önərin həbsini pisləyirik. Bizim fikrimizcə Təbriz Önərin etmədiyi bir əmələ görə həbsi Azərbaycanın hüquq sisteminə heç də baş ucalığı gətirmir. Biz bu həbsi gələcəkdə baş verməsi dəqiq olmayan bir əməlin qarşısının alınması kimi dəyərləndiririk və hesab edirik ki, bu kimi həbslər Azərbaycan gəncliyinə böyük zərbədir.Azərbaycan Respublikasının ali məqsədlərindən biri kimi qarşısına qoyduğu hüquqi dövlət modeli prinsipinə yaraşmayan preventiv həbslər gənclərdə yaradıcılıq deyil məhz dağıdıcılıq hisslərini artırır.
Biz, Dalğa Gənclər Hərəkatı olaraq Azərbaycanda dağıdıcılığın deyil yaradıcılığın tərəfdarıyıq və aidiyyatı qurumlardan Təbriz Önərin dərhal azadlığa buraxılmasını tələb edirik.
Dalğa GH bloqu üçün rəy sistemi qurduğuna görə dostumuz Cavid Ağa'ya təşəkkürlər.
